UNG kunst og kultur
UNG kunst og kultur er eit tiårig verdiskapingsprogram frå 2022–2031 der fylkeskommunen vil bidra til eit breitt og mangfaldig kulturtilbod til barn og unge i heile fylket. Kunst og kultur er eit verkemiddel for å auke trivsel, kjensle av å høyre til og til å utvikle sine ferdigheiter innan det ein likar å halde på med.
Fylkeskommunen vil støtte opp om tiltak som bidreg til å gi ungdom rom til, arena for og møtestader til å lære, erfare, uttrykke seg og utvikle seg gjennom kunst og kultur. Vi skal òg stimulere til forsking på kva verdi kunst og kultur har for barn og unge.
Målet med UNG kunst og kultur er at alle barn og unge i Møre og Romsdal skal ha tilgang til eit breitt og mangfaldig kulturtilbod med høg kvalitet, aktualitet og relevans der dei kan medverke, skape, lære og meistre.
Ung kultur møtes (UKM) er fylket sitt største kulturarrangement for barn og unge og ein viktig arena både lokalt og regionalt. I UKM kan ungdom delta med alle slags kulturuttrykk. Eksempel kan vere Minecraft, dans, lage kostymer, song, organisere og arrangere, fotografere, male, designe, jobbe på scena eller styre lyd og lys.
UKM har som mål å fremme og utvikle ung kultur over heile landet og gjere den meir synleg i lokalsamfunnet. Aktivitet skjer ved arrangement, utstillingar, mønstringar, festivalar og verkstader (workshops). UKM har offentleg finansiering og eksisterer både lokalt, regionalt og nasjonalt.
I Møre og Romsdal er målet å lage ein ny modell som set fokus på UKM som sosial og kulturell møteplass. Hovudprioriteringa er å legge til rette for lokale verkstader innan eit mangfald av kunstuttrykk, arrangere fylkesfestival der barn og unge får utvikle seg innan uttrykket sitt ved hjelp av mentorar samt auka ungdomsmedverknad. UFA (Ungdommens fylkesarrangørar) er ei gruppe med unge frivillige som i tillegg til å vere unge arrangørar under fylkesfestivalen fungerer som ei ressursgruppe for planlegging og evaluering av arbeidet i UKM.
Meir informasjon om kva UKM er, påmelding og når dei ulike lokalarrangement blir arrangert, finn du ved å følge denne lenka til nettsida til UKM.
Fylkeskommunen vil bidra til å lage fleire møteplassar for unge som er interessert i digital kultur.
I Kristiansund har vi saman med Kristiansund kommune og The Convention oppretta Arkaden, ein del av Bakgården ungdomshus. Her kan ungdommar møtast på fritida for å utvikle sine digitale ferdigheiter, drive med animasjon, spele dataspel med meir.
Det er laga ein film om Ulstein Arena og det arbeidet Ulstein kommune har gjort med å kople saman satsing på kultur og folkehelse.
Filmkunstnar Sverre Mollan har utvikla ein interaktiv produksjon saman med elevar og lærarar frå Atlanten ungdomsskole i Kristiansund. Prosjektet har testa ut nye samarbeidsformer mellom skole, kunstnar og DKS. Produksjonen skal ut på DKS-turné våren 2023. Kulturtanken er ein viktig samarbeidspart i prosjektet.
Møreforsking har forska på elevanes oppleving i prosessen med å lage filmen og PhD-stipendiat Egil Ovesen skal gjere eit feltarbeid når produksjonen er ute på turné.
Les meir om produksjonen ved å følge denne lenka (opnast i ny fane).